Alfonso Boekhoudt, ministro plenipotenciario na Den Haag

Segun Prome Ministro Mike Eman señor Boekhoudt tin tur e cualificacionnan necesario, tanto pa locual ta trata e aspectonan diplomatico como tambe e aspectonan economico cu mester wordo atendi na Den Haag. Eman a splica cu Aruba ta riba rumbo pa construccion di e di tres pilar economico cu ta basa riba atrae for di Europa y Hulanda empresa y institutonan pa bin establece nan mes na Aruba manera TNO y Rietveld Academie a haci caba.
Otro tareanan di Arubahuis ta pa atende diferente asunto social di e comunidad Arubano na Hulanda, studiantenan y esnan cu ta bay Hulanda pa haya cuido medico.
Prome ministro Eman ta sigur cu Sr. Alfonso Boekhoudt por maneha tur e retonan aki ya cu e tin experiencia grandi como director di Aruba Ports Authority N.V. y lo sa di mantene relacionnan riba e nivelnan mas halto cu institutonan Hulandes y Europeo. Como Presidente di Rode Kruis Aruba el a duna muestra di e aspecto social humanitario y esaki ta hopi importante pa atende e Arubianonan na Hulanda.