Aruba Airlines a haya permiso pa cuminsa bula

Gobierno di Aruba kier amplia e mercado di turismo y haci e isla un sorto di hub entre Europa y Estados Unidos y Sur America. E mercadonan cu Aruba kier explora proximamente ta Boston y Brasil.
Aruba Airlines lo haci uzo di un airbus 320 y tanto e personal di cabina como esun na tera lo consisti di Arubianonan, algun di nan cu hopi aña di experiencia entre nan cuatro piloto.
Despues di un periodo basta largo di deliberacion entre autoridadnan local di Aviacion Civil y gerencia di Airlines, ministro Otmar Oduber encarga cu Turismo y Aviacion a firma e Air Operator’s Certificate. E acto a tuma luga den presencia di doñonan y representantenan di e compania y di Prome Ministro Mike Eman.
E vision di Gobierno na 2009 tabata pa hunto cu KLM crea un netwerk den nos region hunto cu otro aerolineanan establece na Aruba manera Tiara Air, Insel Air y awo Aruba Airlines. E colaboracion aki ta percura pa mas cupo di trabou, diversificacion di e forsa laboral y di e mercadonan turistico y crea oportunidad pa continuidad.