Aruba preparando pa bishita real

Dia 20 pa 10 or di mainta e pareha lo bishita oficina di Gobernador, Parlamento y Conseho di ministro, pero publico por saluda e pareha dilanti di oficina di Gobierno mientras cu un coro lo duna un presentacion.
Parti merdia Rey Willem-Alexander y Reina Máxima lo bishita Teresita Center na San Nicolas. Mas o menos shen hoben entre 14 pa 24 aña lo haci un exposicion y participa na un debate hubenil unda nan lo presenta nan vision con nan ta wak Aruba den futuro.
Parti anochi lo tin un show cultural na e ruinanan di Bushiribana, e sitio historico na costa nort di Aruba. Henter e area lo bira un escenario pa presenta un show di baile, canto y musica cu efectonan di tecnologia moderno.                                                  

Riba e di dos dia di nan bishita na Aruba, e pareha real lo ta huesped di alumnonan di scol basico y muchanan cu limitacion fisico den Compleho deportivo Guillermo Trinidad.
Pa medio di wega y deporte lo crea un fiesta pa e muchanan y nan tin tambe e oportunidad pa saluda Rey y Reina. Tur mucha lo ricibi un flanel special cu e diseño di Shoco Prins, como un homenahe na e parha nacional di Aruba esta e shoco.
Como clausura di nan bishita na Aruba Rey Willem-Alexander y Reina Máxima lo ta huesped di Gobernador di Aruba durante un recepcion dia 21 di november parti anochi.