Aruba ta logra acuerdo di aviacion liber cu Colombia

Den pasado Aruba no tabatin aerolinea pa ofrece y e frecuencia for di Colombia pa Aruba tabata hopi mas grandi cu vice versa. Awo ta asina leu cu a habri e mercado completo pa aerolineanan di Aruba. No solamente a logra un liberalizacion completo, pero tambe a logra cu vuelonan directo por wordo haci pa diferente ciudad di Colombia.
E acuerdo di cooperacion aki ta consisti di e puntonan palabra anteriormente cu Minister Otmar Oduber, esta e cuarta y quinta libertad pa tanto pasahero como carga; un acuerdo bilateral completamente liber cu ta beneficia grandemente nos aerolineanan local.
For di tur parti di Colombia por tin vuelo directo pa Aruba y esaki ta beneficia e industria di turismo di Aruba.
E delegacion di Aruba cu a asisti na ceremonia di firmamento tabata consisti di director di Departamento di Aviacion Civil, Adi Maduro; consehero di minister di Turismo, Transporte y Labor, Simon Arends; representantenan di Insel Air Aruba y di Aruba Airlines. “Nos ta bay combersa cu e aerolineanan cu a haya permiso pa opera pa Aruba concretisa e acuerdo y ATA na su turno lo duna e sosten necesario. Esaki tabata un exito hopi grandi y naturalmente Aruba lo sali grandemente gana for di dje", Minister Otmar Oduber a expresa.
Pa fin di luna un delegacion di Brasil lo ta na Aruba pa negocia un tratado bilateral cu nos isla y ta den negociacion tambe cu Comision Latinoamericana de Aeronautica Civil pa na momento cu esaki wordo concretisa, por haya tambe e quinta libertad. Esaki ta duna e posibilidad pa por uza Aruba como hub pa otro continentenan.