Temporada di campamento ta acercando y pueblo mester corda pa pidi permiso
pa lanta un campamento sea na laman of otro parti di Aruba y cada hende mester
a atene su mes na e reglanan stipula. Ademas di esey cada grupo cu ta campa
mester establece reglanan y medidanan pa asegura cu e temporada ta bay cu
siguridad y den bon ambiente. Por ultimo, corda cu mester haci areglo pa
siguridad di bo cas tambe!
Un temporada hopi dushi di aña ta den porta, cual ta e
temporada di campamento. Tur hende kier pasa un par di dia dushi ta sosega
curpa na lama. Pero… esaki tambe ta trece cierto preocupacion relaciona cu
siguridad. Ningun hende kier pa un temporada asina termina den dolor di cabez
of tragedia. P’esey Cuerpo Policial kier duna algun sugerencia pa haci e temporada
alegre, relaha y pa tur hende paso bon na un manera sano.
Prome cu tur cos, wak pa bo ta cubri legalmente. Esaki kier men cu si bo ta bay
campa na un luga publico, sea cu ta na beach, den mondi of den Parke Arikok, bo
mester ta cumpli cu e rekisitonan legal. Bo mester tin un permiso legal si bo ta bay
pasa anochi na un luga asina y tambe pa bo pone un tent of algo similar riba
caminda publico. Tur esnan cu no ta cumpli cu e reglanan por haya un boet y
autoridad por pone bo ‘ruim op’ e campamento. Si bo tin un permiso, wak pa bo
cumpli cu tur e exigencianan legal cu ta skirbi den dje (les'e bon!) si no autoridad
lo trat’abo como sifuera cu bo no tin permiso y lo bo por perd'e tambe!
Mayoria hende ta campa na beach y p’esey tur aña tin aglomeracion grandi di
hende ariba beach cu ta trece cierto peligronan cu ne.
Nos ta presenta un lista di sugerencia cu lo por yuda bo haci e ambiente mas
sigur.
- No laga muchanan chikito den lama sin supervision di adulto cu sa landa.
Nan por hoga den un par di seconde! Si nan ta hopi mucha pareu den awa
sinta cant’i awa p’abo por vigila nan y conta nan regularmente. - No bay campa cu cosnan valioso. Tin anti-socialnan cu ta probecha ora cu
hende ta druk of nan ta drumi pa horta cos di hende. No warda nan den
auto tampoco. Ladronnan conoce e trikinan aki! Ta preferiblel pa hiba nan
banco y warda nan den un ‘safety deposit box’. - Wak p’abo tin un bon “First Aid Kit” cu ta contene crema pa preveni y trata
kima di solo, crema pa desinfecta herida, verband y tape pa heridanan
menor, etc. - Wak p’abo tin un telefon celular bon carga (bay cu e charger di auto) na tur
ocasion p’abo por yama Polis of Ambulance den caso di emergencia. - Si bo ta uza aparatonan pa cushina, wak p’abo tin un bon aparato pa paga
candela.Ta preferibel haci areglo pa un hende den e campamento keda
lanta den marduga pa tira bista. - Uza menos glas cu ta posibel pa evita cu ora nan kibra, e pidanan skerpi
por keda atras den santo y corta hende. Uza cups, tayo y otro utensilionan
di plastic. Si bo mira cu otronan a laga boter di bebida, glas pa bebe of otro
cos di glas ariba beach, sea un bon ciudadano y bent’e den bari. - No bay campa cu bestia (cabay, cacho, etc) ya cu esaki ta contra ley y ta
trece extra riesgo cu ne. - Si bo ta bay cu boto, corda pa maneha na un manera responsabel. Corda
cu tin reglanan (ley) ariba lama tambe cu ta casi mescos cu ley di trafico.
Esakinan ta por ehempel; landado semper tin preferencia riba tur boto, jet
ski, etc. Si bo dal un hende cu ta landa den lama, 99.9% di biaha lo bo ta
fout! Boto di bela tin preferencia riba boto di motor. Trafico di man drechi tin
preferencia. Bo no mag subi beach of sali bay pa lama (den un distancia di
mas o menos 50 meter di canto) cu velocidad halto! Bo no mag maneha un
boto of otro vehiculo di lama si bo ta bou di influencia di alcohol of droga. Bo
mester tin un vaarbewijs p’abo maneha un boto etc, etc. Corda tene bo mes
na nan ya cu violacion di esaki facilmente por resulta den un accidente fatal.
Corda tambe cu bo no mag laga cabuya core for di boto (den awa) te ariba
tera, ya cu esaki ta contra ley y por haci hende trompica, sea ariba e cabuya
of ariba e anker (principalmente den scur).
Algun persona ta prefera di campa den mondi. Esaki tambe tin su peligronan y
Cuerpo Policial kier sugeri algun punto cu por tene cuenta cu nan:
- Wak p’abo tin un bon First Aid Kit y tira bon bista riba e muchanan. Nan por
hinca nan curpa cu bushi, cadushi, bringamosa, tuna, etc. - Si un hende cay for di baranca halto y bo ta sospecha cu ela kibra algo, no
move si no tin peliger inmediato! Yama 911 y Polis mesora y ten’e trankil te
ora asistencia yega. - Tene cuidou cu cascabel. Principalmente den e areanan cu ta cay den
Parke Arikok; e poblacion di cascabel a aumenta considerabel y bo no ta
wak nan facil. Esaki ta aumenta e probabilidad pa trapa riba nan y nan lo
por morde bo. Tambe ora nan ta riba tera cora, nan ta bira blanco/shinishi
mescos cu e taki seconan y bo no por wak nan facilmente. Si bo wak un,
no mat’e. Corda cu e ta parti di nos naturaleza y cu ta ABO ta den su cas!
Yama central di Polis (na 100) cu na su turno lo notifica e “Park Rangers” y
nan lo pasa recog’e y hib’e otro caminda. - No mishi cu boa! Nan no ta venenoso y generalmente no t'asina grandi cu
nan por come un ser humano, pero nan por morde bo mahos! Si bo haya
un, djis yama central di Polis cu lo notifica e “Park Rangers”. Nan lo sa kico
pa haci cu ne. - No cende candela den mondi. Si bo ta bay cushina, uza un stoof of BBQ
pit apropia y wak pa uz’e na un manera responsabel. Wak tambe p’abo
por tin un aparato di paga candela yen na man. Si bo hay’ab - Si bo ta bai uza quart racer (ATV’s), jeep of otro vehiculo pa tereno dificil,
corda uza helm y paña apropia p’abo haya menos golpi si bo cay. Core
responsabel y bay solamente cu un guia experiencia. - Bay cu suficiente awa frieu y wak p’abo tin suficiente sombra pa evita
deshydratacion y stroke (zonnesteek) door di mucho calor. - Tambe si bo ta bay campa na un lugar leu, notifica e warda di Polis di
mas cerca y e Park Rangers (telefoon: 582-8001) unda bo campamento
ta p' asina nan por yega mas lihe cerca bo si bo mester di asistencia.
Curasha e Polisnan pa pasa wak e campamento de bes en cuando
pa nan familiarisa nan mes cu e luga.
Corda pa no laga bo cas sin proteccion. Bay cas regularmente y palabra cu
famia of bisiña pa nan pasa bo cas tur dia of tira bista riba dje. Cende luz y
cera cortina anochi y paga luz y habri cortina den dia. Pidi bo bisiña pa recoge
e corant cu nan ta tira p’abo tur dia. Si ta posibel instala un sistema di alarma
na bo cas di un compania di siguridad cu monitor/controla esaki of cu ta yama
bo automaticamente na bo celular. No laga cosnan di balor den e cas si no ta
bay tin hende na cas pa un par di dia. Cualkier cos pidi un famia pa warda bo
cosnan balioso un par di dia na su cas.
Pa mas informacion, tuma contacto cu departamento di Prevencion y Informacion
di Cuerpo Policial di Aruba telefoon 527-2900 ext. 975 of 976
Share this page