Conferencia embahadornan di Reino

Ministro di Financia y Asuntonan di Energia ing. Mike de Meza a splica con Aruba kier yega aña 2020 sin tin mester di depende di combustibel fossiel. E alternativanan lo ta entre otro construccion di un otro parke pa molina di biento, un parke solar na Aeropuerto, y produci energia for di desperdicio na Parkietenbos. Tambe Gobierno ta trahando riba conscientisacion di e pueblo, cambionan di legislacion, incentivo di belasting pa motiva compra di aparatonan y auto cu ta mas eficiente den uzo di coriente y combustibel, introduccion di cambionan den sistema di produci awa y coriente y cambia luznan di caya pa LED.
Tanto prome ministro mr. Mike Eman y ministro encarga cu Asuntonan Economico Michelle Winklaar a enfatisa cu Gobierno di Aruba kier mira e embahadanan hunga un rol importante den crea un netwerk entre empresarionan Europeo y comerciantenan di America. Aruba por lo tin e funcion di un gateway pa e comerciantenan haci negoshi tanto den Europa como America. E economia di servicio aki lo beneficia Aruba enormemente.
Prome ministro Eman ta kere cu e paisnan den Reino Hulandes mester busca e puntonan fuerte di otro, traha hunto y saca for di esey e balor adicional di Reino.
Un total di 18 embahador a participa na e conferencia cu a tuma luga un dia prome cu conferencia di “Europe meets the Americas”.
Na e embahadanan den hemisferio occidental tin conocemento di diferente mercado, tin un bista general di e rednan necesario y pues tin e conocemento pa engrandece comercio entre Europa y America via Aruba. Durante conferencia “Europe meets the Americas” e embahadornan por uza nan conocemento y experiencia pa establece lasonan entre e comerciantenan Europeo y di Sur America. Na e conferencia aki ta participa como 800 delegado for di 17 pais. Un total di 250 negoshi a inscribi pa participa na e conferencia.