Desaroyonan positivo den turismo di Aruba (gearchiveerd)

Cu diferente cifra ministro encarga cu Turismo y Aviacion, Otmar Oduber a mustra con e desaroyo den turismo a tuma luga durante 2011.
E independisacion di Aruba Tourism Authority N.V. un aña y mey pasa a haci cu e organisacion aki a cera aña 2011 cu un reserva di 1.6 miyon florin. ATA a logra haya 5 miyon adicional na room tax di locual nan a presupuesta pa 2011. E meta ta pa e reserva crece den e proximo cinco añanan pa yega na un suma di 13 miyon. Tambe ATA a logra entrega un relato di trabou y un relato financiero na tempo y cu manera menciona caba cu resultado positivo.
Autoridadnan local ta midi e desaroyo di turismo no solamente a base di grado di ocupacion di un hotel of e cantidad di turista, pero tambe a base di loke e turista ta laga atras. Esfuersonan conhuntamente entre e partnernan den turismo manera ATA, Aeropuerto, Aruba Ports Authority N.V., AHATA pa promove Aruba mas y mas den “low season” a conduci cu e turista a gasta mas na Aruba durante 2011 compara cu 2010; un aumento di 8.6% di e tourism receipt cu ta 2.4 biyon florin.
Pa loke ta e temporada di winter proximamente, e aerolinea Norte Americano Delta Airlines a anuncia cu nan lo pone 13.000 asiento adicional for di New York pa Aruba. Lo ta vuelonan directo y diariamente cu un boeing 737. Di su banda ATA lo pone 11% adicional di fondo pa haci promocion pa Aruba den e mercado Norte Americano, e mercado mas grandi pa Aruba.