E di dos conferencia di PACO na Aruba (gearchiveerd)

For di 11 pa 16 di juni proximo expertonan riba tereno di salud, prevencion y obesidad di mas o menos binti pais lo reuni na Aruba pa trata e topico di obesidad bou di mucha.
Nacionnan Uni kier dedica extra atencion na e topico aki, ya cu no solamente e obesidad a bira un problema di salud publico, pero tambe e ta afecta e desaroyo di un pais den su totalidad manera e prestacion na scol of na trabou, produccion etc.
Diferente pais ta tumando medida riba tereno di salud publico, traha mas na prevencion, mobilidad etc. p’asina por logra un comunidad cu ta biba saludabel.
Na e di dos Panamerican Conference on Obesity lo participa dokternan, cientificonan, expertonan riba tereno di salud di WHO, FAO, PAHO, CEPAL, Caricom y di diferente universidad di Merca.
Lo tin diferente workshop cu ta ofrece cupo na mas o menos 200 persona local cu por participa y asina engrandece nan conocemento riba tereno di obesidad y su prevencion.
Durante e conferencia, minister di Salubridad Publico dr. Richard Visser lo introduci IBISA (Instituto pa Biba Saludabel y Activo). E departamento aki lo bay ocupa su mes cu programanan pa stimula movecion y lo traha tambe riba tereno di prevencion.
Pa medio di programanan na scol, charla, eventonan publico etc. lo traha na e prevencion di malesanan cronico manera obesidad. IBISA lo ta dispone tambe di un bus cu lo bishita tur districto di Aruba pa haci chekeo di sanger, controla obesidad, duna conseho etc. y asina lo ta mas cerca di e pueblo.