Entrega di lista pa eleccion diabierna 9 di augustus

Entre 9 or di mainta y 4 or di atardi por entrega lista na Conseho Electoral na ex Havana Beach Club.
E apoderado di cada partido politico lo haya un carta for di presidente di Conseho Electoral den cual ta stipula e orario pa e partido concerni por entrega e lista. Hunto cu e carta lo haya e lista di candidatonan cu mester wordo yena pa e partido y e formularionan necesario.
Segun e Ordenansa Electoral lo mester entrega tambe e siguiente documentonan: declaracion individual di cada candidato cu e ta bay di acuerdo cu ponemento di su nomber ariba lista, combrobante di pago na Departamento di Financia di un suma di AWG. 1.000,-, un pasfoto blanco cu preto di e candidato postula mas halto ariba e lista di e partido y un declaracion por escrito di e color di preferencia di e partido pa su lista ariba e papel di voto segun articulo 30 inciso 2 jo. Articulo 50 inciso 1 a di e Ordenansa Electoral.