Gobernador a bishita Kustwacht y Warda di Polis San Nicolas

ORANJESTAD -Diamars mainta 19 di mei, Gobernador di Aruba, a haci un bishita di trabou na e Punto di Apoyo di Warda Costa Aruba (Kustwachtsteunpunt Aruba), como tambe na Warda di Polis San Nicolas.

Central durante e bishita tabata e impacto cu Coronavirus (COVID-19) tin riba trabou di e instancianan aki. 

Bishita Gobernador Boekhoudt na KustwachtBishita Gobernador Boekhoudt na KustwachtNa comienso di e bishita Gobernador a wordo ricibi door di Hefe di Kustwachtsteunpunt y a haya un splicacion breve riba e trabounan cu actualmente ta keda desplega door di Kustwacht den e awanan di Aruba. Despues Gobernador a combersa cu varios empleado di Kustwacht y cu e militarnan cu na e momento aki ta re-enforsa e personal di Kustwacht. En conexion cu Coronavirus tur frontera maritimo cu Aruba ta cera. Door di e medida aki, unicamente trafico maritimo regular tin acceso na e islanan. Pa por mantene e control aki, Kustwacht a tuma medida den forma di extra patruya riba tera y lama. Kustwacht ta haya apoyo di militarnan di milicia di Aruba (Arumil) y di e di 32 escuadron militar di Marinierskazerne na Savaneta.

Bishita Gobernador Boekhoudt na Warda di Polis San NicolasDespues Gobernador a bishita Warda di Polis San Nicolas y a combersa cu varios agente tocante nan experiencia durante e crisis di coronavirus. Door di e medidanan, ta mas trankil riba caya y esaki ta nifica, entre otro, cu e trabounan di polis den cierto sentido ta di un otro indole. Durante e combersacion e agentenan a duna di conoce cu ora a anuncia e medidanan un luna y mei pasa, na comienso no ta tur hende a tuma esaki na serio. Probablemente e tin di haber cu e hecho cu no ta tur hende tabata suficientemente consciente cu ta trata di un riesgo grandi pa salud publico. Sinembargo, recientemente e agentenan ta ripara cu e situacion ta mehorando considerablemente. E personanan ta mas consciente di kico por y no por, cua ta e riesgo cu Coronavirus ta trece cune pa salud publico y e efecto cu e tin riba nos sociedad. Dependiendo di e desaroyonan y den consulta cu autoridad competente y organisacionnan asocia, ta determina dia pa dia, e trabounan cu KPA ta desplega.

Pa medio di combersacionnan telefonico y, si ta posibel, bishitanan di trabou, Gobernador Boekhoudt ta informa su mes riba e consecuencianan di e brote di coronavirus y ta expresa su apoyo y gradecimento pa e esfuerso di hopi persona den e lucha contra e pandemia. Ta tuma e medidanan den consulta cu e organisacionnan involucra, pa asina e bishitanan di trabou por tuma luga na un manera sigur.

Potret: ┬ęGabinete  Gobernador Aruba

Bishita Gobernador Boekhoudt na Kustwacht   Bishita Gobernador Boekhoudt na Warda di Polis San Nicolas

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options