Mas di 150 empresa na Europe meets the Americas

E idea di e conferencia ta pa Aruba por posiciona su mes como un gateway entre Hulanda y Europa y Sur America pa haci negoshi. Na 2011 Gobierno di Aruba y Gobierno Hulandes a firma un protocol cu ta ofrece Aruba e posibilidad aki. Tambe a haci diferente presentacion pa Parlamentarionan Hulandes y empresarionan di Hulanda. Un delegacion di mundo empresarial y di Gobierno a haci diferente presentacion den e region di Sur America manera na Brazil, Colombia y Panama. Na Aruba mes a organisa diferente charla y workshop pa empresarionan local p’asina motiva nan pa participa na e conferencia y tambe mustra nan riba e rol cu Aruba por hunga como hub di negoshi entre Europa y Sur America.
Aruba tin hopi di ofrece e empresarionan Europeo y Latino Americano manera conocemento di ambos mercado y cultura, e cultura di negosha, e posicion geografico, conocemento di idioma y e relacion cu Reino Hulandes.
Si Aruba logra bira un hub, un gateway entre Europa y Sur America, esaki lo beneficia e crecemento economico di e pais y por spera un aumento di e GPD cu 15%.
E comerciante Arubano, sea di un empresa chikito of grandi, tambe lo tin e oportunidad pa establece contacto cu empresarionan for di exterior. Tambe lo tin lecturanan interesante di entre otro Jose Maria Figueres, Presidente di Carbon War Room y Jan Peter Balkenende, partner na Ernst & Young.
For di Brazil por spera representacion di 20 empresa, 35 for di Colombia, 10 for di Panama, 50 for di Hulanda y otro paisnan cu lo ta presente ta Spaña, Italia, Estados Unidos, Ukraina, Corsou, Bonaire y Venezuela.