Negoshinan chikito a beneficia di “Europe meets the Americas”

Un di nan ta Bio Fuel Aruba, un empresa cu ta recoge azeta di cushina uza na mayoria di hotel y restaurant. Asina ta evita cu e azeta uza ta bay dump y lo no forma un peliger pa salud di hende y daña e medio ambiente.
E empresa ta den deliberacion cu otro usuarionan grandi di azeta manera Arubus, WEB, Aeropuerto y Valero pa recoge azeta uza. Despues cu converti e azeta uza den diesel, por uz’e bek como combustibel pa entre otro bus etc.
Durante e conferencia di Europe meets the Americas, e empresa BioFuel a firma un acuerdo cu Methes Energies di Canada. E acuerdo ta encera cu e compania Canades ta encera entre inversion den ekipo y conocemento. Biofuel lo cumpra ekipo di Methes Energies, pero e empresa di Canada lo yuda Aruba cu conocemento tecnico y hunto e dos negoshinan lo traha riba un plan pa expande nan actividadnan den region Caribense y Latino America.
E acuerdo ta parti di e vision di Gobierno di Aruba pa e isla por fungi como un Gateway y resultado di un mision empresarial na Canada encabesa pa ministro di Asuntonan Economico señora Michelle Winklaar. E mandatario a keda satisfecho di mira e gran cantidad di negoshinan chikito y mediano cu a participa na e conferencia di EMA y ta kere cu mester sigui sosten’e nan den cualkier forma ya cu nan ta forma e weso di lomba di e economia di Aruba.