Otro grupo a caba Formacion Social (gearchiveerd)

Meta di e proyecto ta pa yuda hobennan cu no ta bay scol y cu no ta traha pa haya un formacion p’asina nan por logra algo den bida y evita cu nan por bira victima di cualkier mal bicio.
E formacion ta consisti di cuatro luna di preparacion den Marinierskazerne bou guia di capitan Werleman. Aki nan ta cera conoci cu tur faceta di disciplina manera lanta tempran, yega na ora, determinacion y ehercicio fisico. E otro ocho lunanan ta dedica na atende un curso di Enseñansa pa Empleo y un parti practico, esta stage na un empresa.
Pa bini na remarca pa forma parti di e proyecto un hoben mester participa na diferente test manera di deporte y inteligencia y entrevista.
E hobennan cu a logra finalisa e formacion social ta comenta cu pa logra algo den bida, un persona mester lucha, tin e disciplina, duna respet y ta un bon ehempel pa otro.
Prome ministro mr. Mike Eman a expresa palabranan di gratitud na Gobierno Hulandes cu a yuda realisa e proyecto importante aki pa formacion di hobennan Arubano.
E di tres grupo a cuminsa na januari ultimo y grupo number cuatro lo cuminsa na augustus proximo.
Jessy Ras, lider di e proyecto a expresa cu el a ripara cu na momento e hobennan inicia cu e proyecto nan ta mustra cu nan ta dispuesto pa cambia nan bida, haya un formacion pa despues busca un trabou segun nan talento y capacidad.