Presentacion Proyecto Scol Multilingual

Proyecto Scol Multilingual ta un proyecto caminda e scolnan multilingual ta ofrece e idiomanan Papiamento, Hulandes, Ingles y Spaño desde cu e alumno drenta scol preparatorio te final di scol basico.
Den e scol multilingual e alumno ta siña lesa prome na Papiamento y despues ta transferi su habilidad di lesa pa e palabranan cu e conoce caba na Hulandes (desde mita di klas 2), Ingles (desde klas 4) y Spaño (desde klas 5).
Papiamento ta e idioma di instruccion desde scol preparatorio te klas 4 y desde klas 5 ta introduci Hulandes como idioma di instruccion. Asina por sigura cu e alumnonan tin un fundeshi fuerte na Papiamento y Hulandes, cu ta forma un base fuerte pa despues nan por sigui haya les na Hulandes.
Desde 2009 a cuminsa cu programa multilingual den dos scol piloto preparatorio. Na augustus 2012 a sigui introduci e programa den klas 1 di dos scol basico. Gradualmente lo sigui cu e introduccion den e proximo añanan escolar den klas 2, 3, 4 y 5 te ora yega klas 6 na 2017-2018.
Pa ofrece e programa multilingual Departamento di Enseñansa Aruba a desaroya diferente material y metodo nobo. Tambe a ofrece guia y trayectonan di profesionalisacion na e cabesantenan y e maestronan den e scolnan multilingual, conhuntamente cu Instituto Pedagogico Arubano.
A base di e experiencia den e scolnan piloto ta prepara e programa final y un trayecto di implementacion ahusta pa por cuminsa implementa e programa multilingual den otro scolnan preparatorio y basico tambe.