Reino ta cera acuerdo di cooperacion cu Venezuela

Minister Hulandes Timmermans di Relacion Exterior a firma e acuerdo na Caracas hunto cu Minister President Eman di Aruba y Minister President Hodge di Corsou. Timmermans: “Tur cuatro pais di Reino kier estrecha e lasonan cu Venezuela. Nos kier ta e brug entre Europa y Latino-America y vice versa. Tin un potencial grandi den nos relacionnan social, politico y economico. E bishita aki ta un prome paso importante”.
Aruba y Corsou ta keda cerca di e costa di Venezuela y tin actividadnan comercial ambos banda. Tambe ta existi lasonan familiar y historico entre e pueblonan.
Den e acuerdo a acorda cu ta bin mas cooperacion riba tereno di agricultura, maneho di awa, medio ambiente y energia. For di Venezuela tin demanda pa mas conocemento y tecnologia riba tereno di cultivo di flor y plantacion di batata. Shell tin conocemento tecnologico cu e compania Venezolano di petroleo PDVSA por haci bon uzo di dje. Venezuela tin un di e reservanan mas grandi di petroleo na mundo.
Timmermans a finalisa tambe un tratado di Reino cu Venezuela over di vuelonan di estado y militar den e area internacional di Venezuela. El a entrega oficialmente e notificacion di e ratificacion Hulandes na e Minister Venezolano pa Relacion Exterior, Elias Jaua.