Seminario di nefrologia cu expertonan mundial (gearchiveerd)

E specialistanan di Aruba a invita expertonan di diferente hospital den exterior pa yuda presenta un nota cu ta regarda deteccion, prevencion y tratamento di malesa di riñon pa tur persona envolvi den tratamento di pashent di riñon. Mas di cien persona a registra pa participa na e seminario.
Problema di riñon ta wordo causa principalmente pa diabetes y hipertension y e cantidad di pashent na Aruba cu a yega y ta yegando e estado critico cu nan mester tuma dialisis ta alarmante segun minister di Salubridad y Deporte, dr. Richard Visser. E seminario ta dirigi specialmente na "upgrade" e conocemento medico y combina esfuersonan pa purba combati e problema cu nos tin cu malesanan cronico no contagioso manera diabetes y hipertension. Obesidad, como contribuyente na diabetes y hipertension, tambe ta hunga un rol como un di e causantenan, nefrologo dr. Agustin Garcia ta splica.
Aruba tin mas di 145 pashent di dialisis, kendenan ta wordo trata na e centronan di dialisis na Hospital y na Oranjestad.
Un deteccion tempran por evita y preveni cu e cifra ta subi y ta evita cu un pashent mester bay over na tuma dialisis. Dialisis tin un impacto severo riba e calidad di bida di hende, pues ta un tratamento no deseabel pa e pashent, Minister Visser a expresa. E mandatario ta boga pa chekeo anual pa tur hende, specialmente esnan cu por ta pertenece na un grupo di riesgo y tambe mester sigui traha ariba e parti preventivo.